Pas mbukak email nang inbox, ana kiriman sekang situs sosial networking sing isine ngajak gabung, jere gabung bisa nambah gaul, nambah kanca, lan akeh manfangat liane.

Bar guwe iseng-iseng tak bukak situse, wah lumayan ketone, beda karo situs social networking sing wis tau tak bukak. Sekang iseng-iseng terus dadi mandan kepengin ndaptar dadi anggota.

Terus tak sidakna ndaptar, form sing di perlukna tak isi. bar guwe ana email konfirmasi meng emailku, terus tak aktifna.

Nah siki masalaeh, basa proses registrasine rampung jebule sekang situs guwe ngirim email meng kabeh daftar kontak email ku. Mawi kabeh koh, sing nang yahoo, nang ym karo sing nang outlook mbarang. Sing repot sing nang outlook.

Huh gething temenan koh!

Bedul : ” Nek bar adus koe nganggo klambine gimin apa kathoke gimin?”

Peno : ” Ya kathoke gimin”

Bedul : ” Ya ora kena. domaih”

Peno : ” Klambine gimin ya kena lah”

Bedul : ” Ya padabae domaih”

Peno : ” Lah rika sih priwe, nganggo klambine gimin domaih, kathoke gimin domaih, sih kepriwe?”

Bedul : ” Men ra domaih nganggo klambi utawa kathoke dewek, nek nganggo ndeke gimin mengko ya domai nang bojone kang gimin”

peno : ” huuulaaahhh ……”

Wis lumrah nek bocah cilik senenge dolan karo dolanan. Ora mbiyen ora siki padabae. Mung bedane dolan lan dolanane bocah cilik siki wis serba instan, wis nganggo tekhnologi canggih nek jaman mbiyen serba alami, mawi gawe disit, jarang banget sing tuku.

Ingon-ingon ya beda, nek jaman siki bocah cilik ingon-ingone hape sing ngentek-ngentekna duit, nek jaman mbiyen paling ingon-ingone dara, manuk, apa jangkrik.

Nek dara biasane tuku, tapi nek jangkrik karo manuk mung gari nggolet nang gunung, karangan utawa nang sawah. Nek manuk sing di golet susueh, modele di thengi (diaku) sit, Sing weruh pertama statuse chin, nduwe hak anak manuk sing paling gede. Nomer loro statuse ron, kebagean ngunduh manuk, nek susueh nang wit sing duwur berarti kon menek. Nomer telu statuse lun, nomer papat pan lan seteruse.

Nomer telu mengisor kadang ya ra kebagean apa-apa. Istilah chin, ron, lun mbuh sekang ndi asale, ngerti-ngerti istilah guwe wis di enggo nang bocah-bocah cilik nang Bangsari, mbuh nek nang daerah-daerah liane enyong ra ngerti.

Nek nggolet jangkrik biasane mangsan-mangsanan. Umume nang mangsan ketiga, utawa nang mangsan wong tani agi nandur palawija. Carane nggolet bisa awan bisa mbengi, nek nggolete mbengi jenenge obor jangkrik.

Ora awan ora wengi pada bae cara nggolete, yaguwe mbongkahi lemah, mung nek awan untung-untungan, soale ora mesti lemah sing di bongkah ana jangkrike. Nek wengi, sedurunge mbongkah lemah, jangkrike di incim gisit, sing diincim suarane, mengko nek wis genah sumber suarane nembe dibongkah lemaeh.

Jangkrik sing paling disenengi yaguwe jangkrik sungon. Nek kaya cliring, clekithet uga disenengi, mung esih kalah nek di bandingna karo jangkrik sungon. Jangkrik sing disengiti kaya gedubur karo gendawang, soale rupane medeni tur ngengkrike ora apik.

Ana salah siji sawah nang bangsari sing dienggoni jangkrik akeh banget. sawaeh nang kidul sier, mbuh ndeke kaki sapa enyong ra ngerti. Sebab jangkrike akeh banget mangkane samben ndina nggo jag-jagan bocah sing pada ngaraih jangkrik, ora isuk, ora awan ora sore. Padahal nang sawah guwe anan tandurane pare. Dadine tandurane pare rusak terus sing ndadekna wong sing duwe sawah kesuh.

Enyong pernah ketiban sial. Isuk-isuk agi nggolet jangkrik nang sawah guwe, denger-denger konangan nang sing nduwe sawah. Jalaran wis banget kesueh mbok, langsung bae wong guwe ngoyok sekabehane bocah sing agi pada nggolet jangkrik karo ngacung-ngacungna arit. Bocah-bocah termasuk enyong pada keweden, pada mlayu kocar-kacir ora nggenah. Wis ora ndelengna sawah sing lungkane amba-amba, sing penting slamet.

Duh pak nyuwun ngapurane nggeh, wong jenenge bocah ya ngertine seneng. Ayuh kang pada nggolet jangkrik, tapi aja ngerusak tandurane wong.

Wis 2 wulanan kie aku rung bali meng bangsari, padahal wis kangen karo rama biyunge, wis kangen karo keluarga nang bangsari.

Kebeneran awal bulan mei ana hari libur, posisine nang dina kemis maning, ketone koh enak temen ya nggo bali meng ndesa. Dina jemuah wong kadar harpitnas tulih mbolos ora papa mbok.

Tapi jyan ndilalah kerjaan ya ana bae sing kudu enggal-enggal dirampungna, ya wis sidane ra sida bali, padahal wis koar-koar karo kanca-kancane je, maune arep rencana ngumpul-ngumpul, ndopak-ndopok dadi ra sida, ya wis lah kapan-kapan maning lah, kadar tanggal 20an wulan kie kan ana preian maning, posisine padabae maning dina selasa, dadi senene bisa dianggap harpitnas.

Moga-moga ora ngalami nasib serupa kaya rencana bali siki.

Anu agi langka bahan sing arep ditulis, dadi mandan jarang ngeblog. Ketambahan maning gawean agi pirang-pirang, tapi sing paling sering dilakoni ya ceting.
Terus nang kampus agi musim ujian. Jyan kuliah koh dela-dela ujian. Ngesuklah nek pikirane agi mandan nyante ngeblog maning

Salah siji kebudayaan sing menonjol nang kawasan banyumas yaguwe lengger. Ora kecuali nang desaku bangsari, lengger uga akeh disenengi nang wong-wong ndesa, ora sing tuwa ora sing nom nek ana pagelaran lengger pada seneng nonton.

Mbok sedulur kepingin ndeleng lengger tapi ora kober bali meng desa giye ana video rekaman lengger sekang daerah penanggungan, komplek medeng sing wis di upload nang youtube.

Mangga sami mirsani, aja lali karo mangan gembus…

Kaya giye mbok yah rasane dadi wong sugih, jyan kepenak pisan koh. Awan-awan ngerungokna gendhing banyumasan karo nginum kopi, srupuuutt…hmmm mantabb

Ceritane aku wingi bar mbukak database-e milis banyumasan, terus nang kono nemu file mp3 lagu-lagu banyumasan. Lagu sing faforit nek menurutku sing kae lah sing tentang baturaden.

“Senajana ana nang pegunungan…..

(teruse ora ngerti)

baturaden baturaden

ati susah bisa dadi bungah

ati susah dadi bungah”

Kaya guwe lah syaire, tapi aku ora apal kabeh. Mbok ana sing ngerti syaire ngenehlah aku njaluk.

Basa kerungu lagune dadi kemutan jaman SMA mbiyen. Pas kelas telu aku kos nang sanding sekolahan. Sing nduwe umah wonge wis tuwa, saben ndina unin-unine nek ora wayang ya banyumasan utawa peang-penjol. Duh, dadi kemutan nganah-nganah ya, kang Ihaq, kang Eko Cahyono, Kanca-kanca SMU Negeri Sidareja, hmmm…

“kerjaa!!!!! ngeblog mulu….”

gubraaaakkk…

“oh iya pak, gak ini cuma iseng-iseng eh cuma baca eh cuma bla bla bla”

Mbawon Pari Angel-angel di Lakoni

Giye nang desaku, nek jamane panen pari arep mbawon mesti rebutan. Masalaeh sing jenengane penggawean nang ndesa guwe angel banget. Nek wis tiba mangsan panen pari, berarti penggawean pirang-pirang. Penggawean sing ora kenal jenis pendidikan, sing penting rosa ya ulih akeh.

Padahal mbawon guwe udu kerjaan sing mayar, kerjaan sing udu dikerjakna nang ruangan, njegong nang kursi empuk, andamaning ana pendingine. Mbawon utawa kerja ngunduhna parine wong liya guwe kerjaan sing dilakoni nang sawah, panasan, kotor, gatel, lah jan pokoke rekasa lah. Andamaning nek pas musim panen rendheng utawa panen mangsan udan, wis banyune jero, parine pada rubuh, terus nek nyonggah dalane ya lunyu, mbeluk, metek pisan.

Tapi nek mangsan panen sadon, biasane panen kepindo kanggo sawah sing ora ngendelna irigasi, guwe mandan mendingan. Sawaeh gere, parine esih ngadeg ora rubuh, dalane sing nggo nyonggah ya kepenak. Tapi masalaeh nek mbawon nang mangsa sadon guwe pada rebutan. Sing marakna nggole mbawon rebutan guwe antarane:

• Ora kabeh sawah bisa panen, dadi kesempatan nggo mbawon lewih sethithik.
• Lewih kepenak kahanane, kayatha sawaeh garing, dalane kepenak, dadi sing maune ora gelem mbawon dadi gelem mawon
• Biasane bar mangsan panen terus sawaeh garing nganthi pirang-pirang wulan, dadi nek ora duwe simpenan pari akeh bisa-bisa kenthongan beras tekane mangsan mbawon maning.
• Rega pari panenan sadon lewih larang ketimbang panenan rendheng. Sebabe nek pari rendeng guwe wite rubuh terus ke kum banyu, dadi berase mandan ora patia apik.

Aku mbiyen jamane esih sekolah sering melu mbawon. Jan rekasa pisan. Aku melu mbawon nang sawah sing mandan adoh sekang dalan utama (dalan sing bisa diliwati pit). Ya biasa, nggole ngarit rebutan, malah nganthi saking buru-burune men cepet ulih akeh malah tangane keperang arit. Bar rampung ngarit, terus hasil aritane ditumpuk dadi siji, dipangguli tuk segulung. Wujude esih wit pari separine.

Kadang ya engkel-engkelan rebutan hasil aritan, biasane dialami nang pembawon amatir, nek sing pembawon mahir mah ana kodene dewek-dewek. Misale rit-ritanku mujur ngalor, terus sing nang sandingku mujur ngidul utawa ngetan. Basa hasil rit-ritane wis dikumpulna dadi siji terus digedig. Gedig guwe artine ngerontokaken pari sekang wite, alat-alat sing diperlukna tenda, bagreg, karo kandhi. Nek mangsan rendeng, kudu gawe papan nggo nggelar tenda gisit men parine ora kenang banyu.

Wis rampung gedhig tersus parine diwadaih kandhi. Sekandhi biasane amot 40-50 kilo pari. Terus parine digawa meng ndalan sing bisa diliwati karo pit. Nggole nggawa meng nggili dipanggul ngliwati galengan sing lunyu, malah sampe nyebur-nyebur banyu sing jerone kadang sewudel.

Tekan ndalan, kandhine di tumpakna pit terus dijujugna nanggone wong sing duwe pari, utawa diarani nyonggah. Umaeh wong sing duwe pari padahal adoh, bisa luwih sekang 2 kilometer. Terus nang kana parine ditimbang, nembe dibawoni. Dibawoni maksude wong sing mbawon diwei upah sing wujude pari. Gedene bawon guwe 1/6 bagian. Dadi nek bisa ngunduhna pari 60 kilo, upaeh 10 kilo. Wong sing rosa sedina bisa manen tekan sekintal. Berarti upaeh 16,6 kilo. Nek sing duwe sawah mule gelem diimbuih 2 kilo, dadi 18,6 kilo.

Guwe esih wujud pari teles, mengko nek wis di garingna paling dadi 14kiloan. Nek rega pari siki sekintal Rp 250.000 berarti sedina setara karo Rp 35.000. Guwe wis termasuk rosa. Padahal si jenenge mbawon guwe ora diwei wedang andamaning madang. Nek digawe beras, pari garing sing bagus 10 kilone bisa dadi 7 kilo beras.

Nek ngemuti mbawone tah rekasa banget, tapi basa wis dadi sega, kadang madang bisa sampe ora enteng koh, kadang ya nelangsa ndelengna sega di sia-sia. Malah jere nek nang kota, etika madange malah kon aja dientekna, jere nek madange dientokna ketone kaya wong agi kencoten. Jan wong kota, ngertine wis dadi beras, njajal kon mbawon kayane klenger luh.

Wis udu rahasia maning, akeh pengenoman nang ndesa sing pada nembe lulus sekolah, sekolah apa bae sing bar guwe terus ora nerusna maning, akeh sing pada nduwe kepenginan lunga kerja nang jakarta. Malah ana bae bocah sing urung rampung anggone sekolah wis ora sabar kepengin lunga kerja meng njakarta, sampe-sampe sekolahe ora diterusna, padahal wis meh rampung. Ana maning sing wis ngerasa ora kepenak karo wong tuwane jerene njaluk duwit bae nggo mbayari sekolah, sidane metu sekolah, terus lunga kerja nang jakarta. Gumune sing dadi wong tuwa ya ana bae sing ora ngelarang. Apa nggane wong tuwane wis lali nek kebutuhane bocah guwe tanggungane wong tuwa.

Tapi ya kepriwe maning, akeh-akehe bocah sing pada metu sekolah terus kerja guwe sekang golongan wong wog sing ekonomine pas-pasan, utawa malah kurang.

Padahal urip nang njakarta, utawa kota-kota gede liyane guwe ora segampang sing digambarna nang film utawa sinetron. Sing jenenge nggolet gawean guwe kayanu nggolet dom nang tumpukan damen. Umpama ana gawean sing kepenak digoleti paling akhire kesel thok ora ulih duit. Kaya kancaku sing diterima dadi staff HRD jebule malah kon adol panci keliling. Mawi regane panci guwe ra lumrah, mbuh payu mbuh ora, sing genah ya kesel muter-muter nggoleti wong sing gelem dilemboni. Nek dideleng sekang dandanane tah iya, dasian, kelambine dilebokna, pokoke necis pisan lah.

Nek gawean nang njakarta tah akeh bae, tapi masalaeh mbuh ana sing mbayar mbuh ora. Contone ya mbersihi selokan sing pada mampet men jakarta ora dela-dela banjir nek ana udan. Tapi apa gelem mung dibayar karo seGANJARAN tapi ora ulih sega sing dipangan nggo dewek.

Akhire merga saking ora ana gawean, arep bali meng ndesa isin, urip nang jakarta ya kudu ana biayane akeh bocah-bocah nom sing pada gawe-gawe gawean. Sing maune ra perlu dikerjakna malah dilakoni. Umpamane dadi tukang parkir liar. Ana maning sing luwih ngawur, biasane kan nang dalan-dalam cilik nang perumahan nek ana pengkolan dibruki kaca sing tujuane men pengguna dalan ngerti pengguna dalan liyane sing sekang arah berlawanan. Eh malah kacane dirusak. Terus nang kono pada berlaga dadi pengatur dalan karo njaluki duit.

Tumprape sing satria, beda maning carane, mereka (loh deneng dadi basa indonesia) pada gelem kerja apa bae sing penting perwira, kaya dadi kuli bangunan, kuli pasar utawa pembantu rumah tangga (caraku sing kaya giye satria sebab ana hasil karyane sing bener-bener migunane kanggo sing aweh gawean utawa sing mbayar)

Giye Masalaeh
Sekang awal bocah-bocah sing pada lunga kerja meng njakarta biasane nduwe tujuan kepengin luwih maju, maju keuangane, maju kawerueh, sing akhire bisa mbantu wong tuwane utawa dulur-dulure sing nang ndesa. Tapi basa nang njakarta wis bisa kasil duit malah kelalen karo niate mau. Wong kasile urung sepiraa wis pada gembelengan melu-melu gaya hidupe wong-wong sing wis pada duwe duit akeh. Umpamane pada apik-apikan handphone, pada kesenengan nuruti hawa nepsune, pada urip sing wah-wah lah pokoke.

Sing lucune ana kancaku sing HP-ne apik tapi ora bisa tuku pulsa, terus ora isin njaluk tukokna pulsa karo wong liya. Mbok sing jenenge pulsa HP termasuk kebutuhan sing nomer sekian kanggo mereka-mereka, wong ora nduwe be ora apa-apa koh.

Kudune ya (giye caraku luh) nek rumangsa agi trukah, andamaning udu nang nggone dewek, mbok yaa nggole nganggo duit diatur. Dari pada mung entok nggo tukuni pulsa utawa nggo dolan-dolan mendingan duwite ditabung men mengkone bisa usaha dewek. Utawa dienggo go nerusna sekolah maning meng ana peningakatan pendidikane.

Apa iya uripe kepengin kaya guwe bae, ngontrak, pas-pasan. Mbok ya mengko-mengkone rekasa. Ya siki esih dewekan urung patia keton masalaeh. Tapi sepuluh utawa rong puluh taun maning, mbok melas karo anak-anake ( Wallahu a’lam). Keton-ketone penduduk miskin kota luwis rekasa ketimbang penduduk miskin desa, sebab jiwa sosial masyarakat kota guwe lewih rendah dibanding penduduk desa

bersambung.

Mau isuk pertama mbuka detik.com aku mandan kaget sekaligus bersedih. Isi berita didominasi karo berita tentang kematian tokoh politik negara pakistan sing jenenge benazir bhutto, mawi matine sebab perkara sing menurutku ora lumrah. Bhuto mati merga dipateni nang wong sing urung jelas identitase. Nek ora kenang bom ya merga ditembak.

Jan wong-wong deneng koh ya senenge pada pethakilan bae ya, apa ora bisa pada urip guyub rukun. Pada bareng-bareng mbangun negara lan bangsane. Nek pada-pada sebangsa wis pada paten-patenan sih kapan bisa maju negarane.

Moga-moga bae nang indonesia ora kedaden peristiwa sing kaya guwe lah. Andamaning giye nang indonesia delamaning arep ana pemilu, sik tak jaluk ya aman-aman bae lah. Ari nuruti nafsu sih karuan kepengine pada gelutan bae. khususe wong-wong nom guwe, tapi mbok ya eling karo anak putu ngemben. Nek siki esih mikir gelutan bae tulih tekan jamane anak putune dewek ngemben bangsane dewek esih sengsara bae.